សម្តីបុរស សម្ផស្សនារី

បទកាកគតិ

+សម្តីបុរស                               ផ្អែមល្ហែមពីរោះ                        ប្រៀបដូចទឹកឃ្មុំ
-ចេះពោលដូចពិត                    ទាក់ចិត្តក្រមុំ                             ចេះសើចចេះយំ
លួងសុំស្នេហា ។

+សម្តីបុរស                               តែបានផ្តងផ្តោះ                        នឹងនារីណា
-ខំប្រឹងកាឡៃ                            ច្នៃឲ្យរាបសារ                           បន្ទន់ចិន្តា
ប្រាថ្នារូបកាយ ។

+សម្តីបុរស                               អាចជាពិសពស់                        ពិសពុលទាំងឡាយ
-ផ្អែមមុនចត់ក្រោយ                  ឲ្យស្រីលង់កាយ                        កើតក្តៅក្រហាយ
យំស្តាយសម្តី ។

+សម្តីបុរស                               វាអាចជាគ្រោះ                          របស់ស្ត្រី
-អាចជាផ្លែល្វា                          អាចជាតន្ត្រី                              បំពេរចិត្តស្រី
ឲ្យលង់ភ្លេចប្រាណ ។

+សម្តីបុរស                               អាចថាមានស្មោះ                      ស្មគ្រពិតក៏បាន
-អាចថាភូតភរ                          ភូតយកតែប្រាណ                     បានតែរំខាន
សន្តានឲ្យខ្វល់ ។

+សម្តីបុរស                               ច្រើនតែប្រុសៗ                        ពោលដោយកិច្ចកល
-មានស្មោះខ្លះដែរ                     តែមិនសូវសល់                         ប្រៀបបីដូចខ្យល់
រសាត់គ្មានត្រើយ ។

+សម្តីបុរស                               ដូចពពកហោះ                          គ្មានលំនឹងឡើយ
-ឃ្លីងឃ្លោងដូចខ្លែង                  ខ្យល់ខ្លាំងរហើយ                      រសាត់ប៉ើយៗ
តាមទិសវាតា ។

+សម្តីបុរស                               បើបានជាស្មោះ                        ស្មោះឥតសាវា
-ហ៊ានប្តូរជីវិត                           មិនគិតមរណា                          លះបង់សង្ខារ
រក្សាសម្តី ។

+សម្តីបុរស                               ស្បថជូនទាំងអស់                     ចំពោះស្ត្រី
-យកព្រៃយកភ្នំ                         យកមេឃទឹកដី                         ធ្វើជាសាក្សី
សេចក្តីស្នេហា ។

+សម្តីបុរស                               បើបោកវិញនោះ                       បោកគ្មានមេត្តា
-លាក់ពុតក្នុងពោះ                    ពីរោះវាចា                                 ឯចិត្តជាខ្លា
គ្មានត្រាប្រណី ។

+សម្តីបុរស                               ស្តាប់ហើយភ្លេចអស់                 ភ្លេចកេរ្តិ៍ប្រពៃ
-វាជាអាភៀន                            ញៀនជាប់ចិត្តស្រី                     ប្រល័យរូបស្រី
អស់ជាច្រើនហើយ ។

+សម្តីបុរស                               ហោះទៅទំលុះ                         ទ្រូងស្រីទាំងឡាយ
-ស៊ីអស់បេះដូង                         រូងស៊ីចិត្តកាយ                          ឲ្យស្រីមេម៉ាយ
មុនថ្ងៃរៀបការ ។

+ស្រីៗទាំងអស់                        កុំជឿឲ្យសោះ                           សម្តីប្រុសណា
-ចេះដឹងតិចតូច                        ស្តូចការសិក្សា                          រស់ខ្វះបញ្ញា
ខ្វះការព្យាយាម ។

+ខ្លះគ្រាន់តែស្តាប់                     គ្នាតាមទូរស័ព្ទ                          ស្រាប់តែជឿភ្លាម
-មិនទាន់ស្គាល់ចិត្ត                    ស្គាល់ត្រឹមតែនាម                     ឃើញភ្លេតយកភ្លាម
នាងអឺយ!…ជាទុក្ខ ។

+សម្រស់នារី                            វាមានឫទ្ធី                                 លែងក្រៃកន្លង
-សម្ផស្សទន់ភ្លន់                        បានគន់ម្តងៗ                           ប្រុសៗសៅហ្មង
ចងចិត្តប្រាថ្នា ។

+សម្រស់នារី                            វាមាននាទី                                បន្ទន់ចិន្តា
-ធ្វើឲ្យប្រុសល្ងង់                       លង់ភ្លេចអាត្មា                          ភ្លេចការសិក្សា
ភ្លេចការងារផ្ទះ ។

+សម្រស់នារី                            ពង្វក់ពង្វី                                  អស់ប្រុសច្រើនណាស់
-ប្រុសៗទាំងឡាយ                   មិនថាក្មេងចាស់                        រួមទាំងតាខ្លះ
វក់ភ្លេចសីលទាន ។

+សម្រស់នារី                            គ្រោះថ្នាក់គ្មានពីរ                      ចំពោះអ្នករៀន
-តែវាជាថ្នាំ                                សម្រាប់អ្នកមាន                        វាជាគ្រឿងញៀន
នៃពាលទាំងឡាយ ។

+សម្រស់នារី                            ប្រុសខ្លះវក់វីរ                            គិតថាសប្បាយ
-វក់ភ្លេចប្រពន្ធ                          ភ្លេចកូនអត់បាយ                      ទ្រព្យធនលែងស្តាយ
ស្តាយតែសម្ផស្ស ។

+សម្រស់នារី                            អាចចូលទៅស៊ី                         ប្រមាត់បុរស
-ស៊ីថ្លើមស៊ីសួត                         ឲ្យស្ងួតក្រៀមក្រោះ                  បឺតស្រូបរូងអស់
ខ្សោះឈាមបេះដូង ។

+សម្រស់នារី                            ជារោគដែលស៊ី                         ចិត្តប្រុសត្រង់ទ្រូង
-ឲ្យប្រុសក្អកក្អួត                       មានឆ្កួតម្តងៗ                           វាជាចំណង
ចងឲ្យជាប់ទុក្ខ ។

+សម្រស់នារី                            នាសម័យថ្មី                               ថ្ងៃនេះទៅមុខ
-វាជាក្តីព្រួយ                             ជាមួយនឹងសុខ                         គឺវាជាគុក
អ្នកទោសតណ្ហា ។

+សម្រស់នារី                            ប្រុសយើងគប្បី                         លៃដោយបញ្ហា
-កុំរើសដោយចិត្ត                      គិតដោយកាមា                         គួរយកបញ្ហា
រើសផ្កាណាល្អ ។

+កុំរើសឲ្យសោះ                       ផ្កាមានសម្រស់                         ស្រស់ល្អតែពណ៌
-គ្មានក្លិនគ្មានទង                      លម្អងកេសរ                             កូនអឺយ!ផ្កាល្អ
ទងមានបន្លា ។

+ក្នុងនាមកូនប្រុស                    ត្រូវមានចិត្តស្មោះ                     និងចិត្តមេត្តា
-កុំបានក្រេបក្លិន                       ហើយមិនរក្សា                          បណ្តោយឲ្យផ្កា
រុះរោយគ្មានន័យ ៕

ដក់ស្រងចេញពីសៀវភៅកំណាព្យក្រោមពន្លឺច័ន្ទ

នត្ថិ សន្តិ បរំ សុខំ !

ពុំមានសេចក្តីសុខណា ស្មើនឹងសេចក្តីស្ងប់ឡើយ !

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s